Meer oor die Kursus

Die Diploma in Bybelstudies is 'n geakrediteerde Vlak G kursus (Sien die Prospektus 2008) wat ten doel het om Christene op beide leierskaps- en nie-leierskapsvlak toe te rus vir effektiewe bediening.  

Na voltooiing van hierdie kursus ontvang studente 240 krediete wat ten gunste van registrasie vir die Baccalareus in Teologie gebruik kan word. 

Die primêre kurrikulum bestaan uit drie vakrigtings en is dieselfde vakeenhede wat benodig word ten einde die Sertifikaat in Christelike Lewenswandel te verwerf.  Dit is dan ook bedoel om as intreevlak vir die Diploma in Bediening sowel as die Baccalareus in Teologie te dien.  Die 120 krediete wat studente in hierdie sertifikaatkursus verdien, verskaf die eerste 120 krediete vir die Diploma in Bybelstudies sowel as die Baccalareus in Teologie.  Alle vakeenhede voldoen aan die vereistes vir graaderkenning.  Die Diploma in Teologie bestaan uit 'n verdere 120 krediete, terwyl die Baccalareus in Teologie die finale 120 krediete vir 'n Baccalareusgraad verskaf, asook 'n verdere 120 krediete vir die behaling van die Honneursgraad in Teologie.

Die doelwit in die samestelling van die vakeenhede was die behoeftes van studente wat deur middel van afstandsonderrig studeer, maar daar is geen toegewings gemaak wat betref die standaard van die studierigting nie.  

Die Sertifikaatprogram (Eerstejaarsvlak) vereis dat studente enkele handboeke sal aanskaf, maar die benadering van die Diploma- sowel as Voorgraadse programme het 'n nuwe benadering tot gevolg gehad.  Grepe uit handboeke word verskaf aan studente en daar is geen nodigheid vir studente om enige handboeke aan te koop nie.  Daar is egter enkele aanbevole werke beskikbaar in die boekwinkel, maar die aankoop daarvan is egter geen vereiste vir registrasie en/of voltooiing van hierdie kursus nie.

Die Sertifikaatvlakprogram kan ook slegs vir Bybelstudiedoeleindes geneem word as geheel of as losstaande vakeenhede.  Registrasie vir losstaande vakeenhede in die Diplomaprogram asook Graadkursus is egter nie moontlik nie.  In die geval van registrasie in die Sertifikaatprogram vir losstaande vakeenhede of Bybelstudie doeleindes, ontvang u al die studiemateriaal en werk op u eie tyd deur die materiaal.  Geen werkopdragte of eksamens is van toepassing nie.  In hierdie geval is die koste ook aansienlik minder.  'n Brief van voltooiing sal in hierdie geval uitgereik word en nie die Sertifikaat nie.

Studente wat registreer vir die Sertifikaatkursus, Diplomakursus asook Graadkursus moet 'n aantal werkopdragte tot bevrediging voltooi ten einde die kwalifikasie te ontvang.  'n Finale eksamen sal ook afgelê moet word.   Lees gerus meer oor elke vakeenheid  aan die regterkant van hierdie bladsy.

Vir meer inligting, laai gerus die Prospektus 2008 af.

Alle studiegidse en artikels vir hierdie sertifikaatkursus is ingesluit by die koste van die kursus en is beskikbaar aan studente.  Daar sal egter van studente verwag word om enkele voorgeskrewe boeke aan te koop op eerstejaarsvlak (Sertifikaatprogram).  Daar is ook addisionele aanbevole werke beskikbaar in die aanlyn boekwinkel en dit word sterk aanbeveel dat studente dit aanskaf.  Dis egter geen vereiste vir registrasie en/of voltooiing van hierdie kursus nie.

U benodig geen spesiale sagteware om die voorgeskrewe materiaal in hierdie kursus te lees nie, buiten 'n pdf leser.  Indien u nie oor 'n pdf leser beskik nie, laai gerus Adobe Reader af deur die skakel daarvoor in ons E-Biblioteek onder die kategorie "Programmatuur" te aktiveer.

Diploma in Bybelstudies

Koste van die kursus vir 2008:

• Aansoekfooie:  R 100.00 (moet registrasie vergesel)
• Registrasie:  R 570.00
• As geheel vir Dilomadoeleindes:   
  Totale Koste:   Die Koste van die Sertifikaatkursus (Eerstejaarsvlak) plus R 9 600.00 vir alle vakeenhede wat deel uitmaak van die Diplomakursus (Uitgesluit aansoekfooie en registrasie).
  Studente ontvang 'n CD met alle vakeenhede.  Elke vakeenheid word ontsluit met 'n gebruikersnaam en sleutelwoord.
• As geheel vir Bybelstudiedoeleindes:        
  Vir Bybelstudiedoeleindes in geheel kan slegs die Sertifikaatkursus (Eerstejaarsvlak) geneem word en nie die Diplomakursus nie.  Vir koste sien die Sertifikaat in Christelike Lewenswandel.
  Per alleenstaande vakeenheid; slegs Bybelstudiedoeleindes:    
  Vir Bybelstudiedoeleindes / losstaande vakeenhede kan slegs die Sertifikaatkursus (Eerstejaarsvlak) geneem word en nie die Diplomakursus nie.  Vir koste sien die Sertifikaat in Christelike Lewenswandel.
• Uitreik van Diploma:
  Gratis
• Uitreik van brief van voltooiing:  
  Gratis
• Versending van CD:  R 40.00 per versending